Silvia [una vita da ricostruire]

Co son lontan de ti, Trieste mia,
me sento un gran dolor
e più che zerco de pararlo via,
più me se ingropa el cor.
Le lagrime me cori zo pel viso
e digo fra de mi
che no ghe esisti un altro paradiso
più splendido de ti!

Un buso in mia contrada,
un vecio fogoler,
un sial che pica in strada,
do rose in un piter,
in alto quatro nuvoli,
de soto un fià de mar,
xe ‘l quadro più magnifico
che mai se pol sognar!

Lontan de ti, Trieste, no go pase:
me manca el nostro ziel,
el verde dei tui pini, le tue case
e i muri del castel.
E penso al mio balcon in Rena vecia,
quel caro balconzin!
de dove vedo i monti che se specia
nel golfo zelestin.

Un buso in mia contrada,
un vecio fogoler,
un sial che pica in strada,
do rose in un piter,
in alto quatro nuvoli,
de soto un fià de mar,
xe ‘l quadro più magnifico
che mai se pol sognar!

Lontan de ti, son come l’useleto
che vivi in s’ciavitù
e me dispero e pianzo el mio dialeto
che no lo sento più!
Ma quando torno, canto de alegria;
me salta el cor in sen
e zigo: Ah si, Trieste, ti xe mia!
te voio tanto ben!

Un buso in mia contrada,
un vecio fogoler,
un sial che pica in strada,
do rose in un piter,
in alto quatro nuvoli,
de soto un fià de mar,
xe ‘l quadro più magnifico
che mai se pol sognar!